Fløgstad verk

I "Fløgstad verk" nyttar litteraturforskaren Heming Gujord eit uvant, men overtydande grep når han leverer den mest omfattande analysen og kritiske gjennomgangen av dei hittil 51 bøkene i Kjartan Fløgstads mangfaldige forfattarskap. Gujords informative nærlesing viser fram dei lange linjene, men løfter også fram brota og litteraturpolitiske inkonsekvensar i Fløgstads teori og praksis. Framstillinga stør seg på moderne litteraturteori, men er i liten grad tyngd av unødig analysesjargong. Gujord kommenterer stort og smått av det som er skrive om denne markante og samansette forfattarskapen, og i tillegg har han frå fleire møte og samtalar med Fløgstad fletta inn forfattarens eigne synspunkt og kommentarar. "Fløgstad verk" er delt inn i avdelingar som følgjer skriftprosessane og produksjonslinjene fram til i dag. Avdelingane spenner frå "Danning og Etablering på 1960- og 1970-talet", via "Produksjon og Kommunikasjon på 1970- og 1980-talet" og fram til "Distribusjon og Arkiv på 1990- og 2000-talet". Avdelinga for "Sluttoppgjer" samlar trådane og gjer nedslag i nokre av dei hardaste kulturdebattane i nyare tid. Boka er ein forfattarskapsstudie, men kan også lesast som eit stykke litteraturhistorie frå nyare tid. Boka er skriven for alle som har lese eller kjenner til forfattaren Fløgstad, og som vil vite meir om konfliktlinjene i nyare norsk litteratur, kultur og samfunn.